ದಂಡ್ ಗ್ ದಲವಾಯಿ ಆದಿತ್ತಿನ ಬಿರುವೆರೆನ ಐತಿಹ್ಯ ಉಪ್ಪುನ ಬಾರಿ ಪುಗರ್ತೆದ ಇಲ್ಲಾದಿಗೆ ಬಿಜಿರೆ ಗುತ್ತು...

ಬರಿ - ಪೆರ್ಗಡೆ

ಏನೂರ ಅಜಿಲ ಸಂಸ್ಥಾನೊಡು ಮಿತ್ತರ್ಮೆದ ಮಾನಾದಿಗೆ ಇತ್ ದ್, ದಂಡ್ ಗ್ ದಲವಾಯಿ ಆದಿತ್ತಿನ ಬಿರುವೆರೆನ ಐತಿಹ್ಯ ಉಪ್ಪುನ ಬಾರಿ ಪುಗರ್ತೆದ ಇಲ್ಲಾದಿಗೆ ಬಿಜಿರೆ ಗುತ್ತು. ಏನೂರು, ಗುಂಡೂರಿ ಬೊಕ್ಕ ಬಜಿರೆ ಗ್ರಾಮೊಡು ಬಿರುವೆರೆ ಗುತ್ತುಲೆನ ಪೈಕ್ ಕಡೀರ ಲೆಪ್ಪು ಉಪ್ಪುನ ಗುತ್ತು. ಬಾರಿ ಭೂಮಿ, ಸಂಪತ್ತ್ ಇತ್ತಿನ ಅಂಚೆನೆ ಘನಸ್ಥಿಗೆದ ಸುತ್ತು ಮದೇಲ್ ದ ಇಲ್ಲ ಆದ್ ಇತ್ತಿನ ಬಜಿರೆ ಗುತ್ತುದ ಚಾವಡಿದ ಭಾಗ ಮಾತ್ರ ಒರಿದ್ಂಡ್.

ಮಾರ, ಬಜಿರೆ, ಏನೂರು, ಗುಂಡೂರಿ ಗ್ರಾಮಲೆನ ದೈವದ ಕಲಟ್ ಈ ಇಲ್ಲಾದಿಗೆಗ್ ಮಾನಾದಿಗೆ ಬೊಕ್ಕ ಆಡೋಲ್ತೆದ ಹಕ್ಕ್ ಉಂಡು. ಗುತ್ತುದ ಚಾವಡಿಡ್ ರಾಜ್ಯ ಕುಡಮಂದಾಯೆ, ಮಾರಾವಂಡಿ, ಮೈಸಂದಾಯೆ, ಬಜಿರೆದ ಪಂಜುರ್ಲಿ, ಕಲ್ಕುಡೆ-ಕಲ್ಲುರ್ಟಿ ದೈವೊಲು ಉಲ್ಲ. ಕುಡಮಂದಾಯನ ಬಲತ್ತ ಮರ್ಗಿಲ್ಡ್ ದಂಡ್ ಗ್ ಪೋತಿನ ಹಿರಿಯಾರೆನ ಬಾರಿ ಮಲ್ಲ ಮೂರ್ತಿ ಬೊಕ್ಕ ಸುರಿಯ ಉಂಡು. ಚಾವಡಿಡ್ ಅತ್ತಂದೆ ಪಿದಾಯಿದ ತಾನೊಡು ಅರಸು ವೈದ್ಯನಾಥೆ, ರಾಜ್ಯ ಕುಡಮಂದಾಯೆ ಬೊಕ್ಕ ಅಣ್ಣಪ್ಪಂಜುರ್ಲಿ ದೈವೊಲೆನ ನಿಲೆ ಉಂಡು.

ಈತ್ ಅತ್ತಂದೆ ಕುಪ್ಪೆಟ್ಟು ಪಂಜುರ್ಲಿ, ಕಲ್ಲುರ್ಟಿ ಪಂಜುರ್ಲಿ, ಸತ್ಯಜವತೆ, ಮಂತ್ರ್ ಜವತೆ ದೈವೊಲು ಚಾವಡಿದ ನನೊಂಜಿ ಮರ್ಗಿಲ್ ಡ್ ಉಂಡು. ಬೋದಿಗೆದ ಕಂಬೊಲು, ಮುಚ್ಚಿಗೆ ಉಪ್ಪರಿಗೆ, ಕಾಪುದ ಕಂಡಿ ಇತ್ತಿನ ಬಾರಿ ಸೊಗಸ್ ದ ಈ ಗುತ್ತುದ ಪಡ್ಡಾಯಿ ಚಾವಡಿಡ್ ಒಂಜಿ ಕಾಲೊಡು ಊರುದ ನ್ಯಾಯ ಪಂಚಾದಿಗೆ ನಡತೊಂದು ಇತ್ತ್ಂಡ್. ಬಾರಿ ಬಿರ್ದ್ ದ ಪೂಂಕರೆ ಪಾಡಿ ಕಂಬುಲದ ಕಂಡ, ಅಂಚೆನೆ ಬಾರೆ ಪಾಡಿ ಕಂಡದೊಟ್ಟುಗು 100 ಮುಡಿ ಕಂಡ ಒಕ್ಕೆಲ್ದಕ್ಲೆನ ಪಾಲ್ ಗ್ ಪೋತುಂಡು. ತೋಡಾರ-ಮಿಜಾರದ ಸಂಭಂದದಕ್ಲೆನ ಇಲ್ಲರ್ದ್ ಕನತಿನ ಭಾಮದ ಮಂಚದಂಚಿನ ಮಂಚವುನು ಚಾವಡಿಡ್ ದೀತೆರ್, ಮಂಚವುದೊಟ್ಟುಗು ತೊಡಾರ-ಮಿಜಾರೊರ್ದ್ ಬೈದಿನ ದೈವೊಲೆನ್ಲ ನಂಬುದೆರ್. ಪರ ಚಾವಡಿ ನೂಕುದು 2.5 ಕೋಟಿ ರೂ. ಕರ್ಚಿದ, ಪೊಸ ದೇಕಿದ ಚಾವಡಿ ಕಟ್ಟುನ ನಕಾಸೆ ಮಲ್ದೆರ್.Copyright ©