ಸಿದ್ಧ ಮರ್ದ ಬೈದ್ಯೆರೆ ದೈವ ಮುಡದೆರ್/ಮುಡದಾಯೆ/ಮುಂಡಿತ್ತಾಯೆ :

ನಲುವೆರ್ ಪುರ್ಸೆರ್ ನಕ್ಲು ಕಾಲಭೈರವೆ ಭೂತೊದೊಟ್ಟುಗ್ ಪಡ್ಡಾಯಿ ಸಮುದ್ರ ತೂವೊಡುಂದು ಪಿದಡುವೆರ್ ದಿಂಡ್ ಕೆರೆ ನಂದನ ಬಿತ್ತಿಲ್ ತಂಕರ ಬೈದ್ಯೆರೆ ಇಲ್ಲಡ್, ಕಿರೋಡಿ ಬನ್ನಾಕುಲೆ ಬರ್ಕೆಡ್ ಇಂಚ ಕೆಲವು ಕೋಡಿಡ್ ದೈವೊನು ನಂಬೊಂದು ನಲುವೆರ್ ಜೋಗಿ ಪುರ್ಸನಕ್ಲು ಕೋಟೆಕಾರ ಇಲ್ಲಡೆ ಬರುವೆರ್, ಜಾಲ್ ಡ್ ತಂಕರು ಬೈದ್ಯೆತಿ ಕೋರಾಯಿಡ್ ಅರಿ ಬಾರ್ ಬೀಪುವೆರ್. ಜೋಗಿಲು ಬತ್ತಿನ ತೂದು ಬಿಕ್ಕೆ ಪಾಡ್ರೆ ದುಂಬು ಬರ್ಪೆರ್, ಜೋಗಿಲು ಬಿಕ್ಕೆ ದೆತೊನುಜೆರ್, ಬದಲ್ ಗ್ ಬೈದ್ಯೆತಿ ಬೀಪುನ ಅರಿರ್ದ್ ಅಯ್ನ್ ಕೊಂಡೆ ಅರಿ ಕೊರ್ರೆ ಪಂಡೆರ್.

ಜೋಗಿಲು ಅವುಲೆ ಬುಡಾರ ಕಟ್ಟ್ ದ್ ಕೊರಿ ಅರಿ ಬೆಯ್ಪಾದ್ ಉಂಡೆರ್. ಬೊಲ್ಪುಗ್ ಲಕ್ಕ್ ದ್ ತಂಕರು ಬೈದ್ಯೆತಿಡ ನಮ ಮಲಯಾಳ ದೇಶೊಗು ಪೋದು ಬನ್ನೆಟ್ಟ ನಿನ್ನ ಮಗಕ್ಕ್ ಮದಿಮೆ ಮಲ್ಪಡ ಪನ್ಪೆರ್. ಜೋಗಿ ಪುರ್ಸೊನಕ್ಲು ಪೋಯಿ ಬೊಕ್ಕ ಕೋಟೆಕಾರ ಇಲ್ಲಡ್ ಸಂಪೂತ್ತು ಹೆಚ್ಚ ಆಪುಂಡು. ಸಂಪೂತ್ತು ತೂದು ಜಾತಿ ಸಂಗತ್ತೆಂರ್ ತಂಕರುನ ಮಗಕ್ಕ್ ಮದಿಮೆ ಮಲ್ಪೊಡು ಪಂದ್ ಒತ್ತಾಯ ಮಲ್ಪುವೆರ್. ಒತ್ತಾಯೊಗು ಒಪ್ಪಿದ್ ತಂಕರು ಬೈದ್ಯೆತಿ ಮಗಕ್ಕ್ ಮದಿಮೆ ಮಲ್ಪುವೆರ್. ವರ್ಸ ಕರೀದ್ ಜೋಗಿ ಪುರುಸನಕ್ಲು ಕೋಟೆಕಾರ ಇಲ್ಲಡೆ ಬನ್ನಗ ಮೂವೊಡು ಕೋಟೆಕಾರ ಇಲ್ಲಡ್ ಇಜ್ಜಂದಿನ ಪೊಣ್ಣು ಈಯೋಡು ಉಲ್ಲಲ್. ಪೊಣ್ಣು ಏರ್ ಪಂದ್ ಕೇಂದ್ ತೆರಿನಗ, ತಂಕರು ಬೈದ್ಯೆತಿ ಮಗಕ್ಕ್ ಮದಿಮೆ ಮಲ್ತಿ ಇಚಾರ ತೆರಿಯುಂಡು. ತಂಕರು ಪಂಡಿ ಪಾತೆರ ತತ್ತೆರ್ ಪಂದ್ ಕೋಪೊಡು ಪುರ್ಸನಕ್ಲು ಜತ್ತ್ ಪೋಪೆರ್ ಪೋದು ಮಂಗಾರದ ಕರಿಯದಲ್ಪ ಸುಧೆ ನಡುವೆ ಸಾದಿ ಮಲ್ತೊಂದು ಪೋಪೆರ್. ತಂಕರು ಬೈದ್ಯೆತಿ ಪುರ್ಸನಕ್ಲೆಡೆ ಪೋದು ತಪ್ಪು ನಟ್ಟುವೆರ್.

ಬೈದ್ಯೆತಿನ ದಿಸೆ ತಡೆವಂದೆ ಇಗ್ನೇಸ್ವರ ದೇವೆರೆ ಜಪೊತ್ತ ಮಾಲೆ ಕಡ್ತ್ ಎಡಕೈಟ್ಟ್ ದೆತ್ತೆರ್, ಪೆದಂಬು ಕಡ್ತ್ ದ್ ಕೊರಿಯೆರ್, ದೈವ ಮುಡದಾಯನ್ ಕೊರಿಯೆರ್. ಅವೆನ್ ಜೋಗಿ ಪುರ್ಸೊನಕ್ಲು ಪಂಡಿಲೆಕ ಮಗನ ಕೇಕ್ಕಿಲ್ ಗ್ ಪಾಡ್ಯೆರ್ 'ಉಪದೇಶಿ ಸಿದ್ಧಮರ್ದ ಬೈದ್ಯೆ' ಅಂದ್ಂದ್ ಅಪ್ಪೆ ಮಗನ ಪುದರ್ ಲೆತ್ತೆರ್. ಕೋಟೆಕಾರ ಸಾನ ಕಟ್ಟಾಯೆರ್, ಮಗನ ಕೈಟ್ಟ್ ಪೂಜೆ ಮಲ್ಪಾಯೆರ್. ಊರು ಸೇರಾದ್ ದೈವೊನು ನಂಬುದು ನೇಮ ಬಲಿ ಕೊರಿಯೆರ್. ದೈವ ಅವುಲವುಲು ನಿಲೆ ಆವೊಂದು ಬನ್ನಗ ಉಳ್ಳಾಲದ ಚೌಟ ಅರಮನೆ ಪೊಗ್ಯೆ ಪಟ್ಟದ ಆನೆಗ್ ರೋಗ ಪತ್ತಾಯೆ. ನಿಮಿತ್ತ ಕೇನ್ನಗ ಕೋಟೆಕಾರ ಬೈದ್ಯೆರ್ನ ಬೂತೊದ ಉಪದ್ರ ಪಂದ್ ತೋಜುಂಡು.

ಪಾರಿ ಪನರೆ ಬೈದ್ಯೆರೆನ್ ಅರಸುಲು ಲೆಪ್ಪಾವೆರ್. ಬೈದ್ಯೆರ್ ತಲ್ತಿ ಒಂಜಿ ಚೊಂಬು ನೀರ್ ಡ್ ಆನೆ ಹುಷಾರ್ ಆದ್ ಲಕ್ಕುಂಡು, ಆನೆ ಸಾಲೆಡ್ ಅರಸುಲು ಕೊಂಬು ತಂಬಡ ಹೊರ್ತುಡು ಬಿರುವ ಭೂತೊಗು ನೇಮ ಕೊರ್ಪೆರ್. ನೇಮ ತೂಯರೆ ಉಳ್ಳಾಲ ಗುತ್ತುದ ಸೇಕ ಕೊಟ್ಟಾರಿಲು ಬತ್ತಿನಾರ್ 'ಬಿರುವ ಭೂತೊಡ್ದ್ ಬೊಳ್ಯೋಲ ದೆತೊನಾಯೆ' ಪಂಡೆರ್ ಉಂದೆನ್ ಕೇಂದ್ ದೈವ ಸೇಕ ಕೋಚಾಳೆನ ಮರ್ಮಲೆಗ್ ಮೈಲೆ ಕಜ್ಜಿ ಪಾಡುವೆ. ತಪ್ಪುಗ್ ಸಾನೊಡು ಒತ್ತೆ ಕೊಂಬು ಪಾಡ್ಯೆರ್. ಉಳ್ಳಾಲ ಗುತ್ತು ಕಡತ್ತ್ ಕೆಲವಾರ್ ಕಡೆಕ್ ದೈವ ಪಸರುವೆ.