ಕೌಡೋಡಿ ಗುತ್ತುದ ಬಂಟೆದಿ ಬೊಲ್ಲಕ್ಕು ಬೈದ್ಯೆತಿ :ಗುತ್ತುಗ್ ಬಂಟೆ, ಕಂಬುಲಗ್ ಪೂಂಕರೆ, ಬಾಕ್ಯಾರ್ ಗ್ ಬಾರೆ

ಬಟ್ಟಲ ಗಂದ, ಸೂಡಿದ ಪಿಂಗಾರದ ಹಕ್ಕ್ ನ್ ಪಡೆಯಿನ ಬಿರುವೆರೆನ ಗುತ್ತುಲೆಡೊಂಜಿ ಪುಗರ್ತೆದ ಗುತ್ತು ಕೌಡೋಡಿ ಗುತ್ತು. ಕೌಡೋಡಿ ಗುತ್ತುದ ಬಂಟೆ ಅಜಿಲ ಸೀಮೆದ ದಂಡ್ ಗ್ ದಲವಾಯಿಯಾದ್ ಕೊಲಲಗ್ ಪೋಪಿನ ಕ್ರಮ. ಕಾಲೊಡು ಕೌಡೋಡಿ ಗುತ್ತುಡ್ ಆನ್-ಆಂಜೊವು ದಾಂತೆ ಗುತ್ತುಡ್ ಕರ್ತವೆದಿ ಪೊಂಜೊವು ಬೊಲ್ಲಕ್ಕು ಬೈದ್ಯೆತಿ ಬೊಕ್ಕ ಜೋಕುಲು ಮಾತ್ರ ಇತ್ತಿನ ಕಾಲೊಡು ನಂದಾವರದ ದಂಡ್ ಅಜಿಲ ಸೀಮೆಗ್ ಬತ್ತಿನ ವಿಚಾರ ಅರುವದ ಅರಸುಲೆಗ್ ತೆರಿಯುಂಡು. ಅರುವದ ಅರಸುಲು ಕೌಡೋಡಿ ಗುತ್ತುದ ಬಂಟೆ ದಂಡ್ ಪತೊಂದು ನಂದಾವರದ ದಂಡ್ ಕಾದೆರೆ ಪೋಡು ಪಂದ್ ನಿರೂಪ (ಓಲೆ) ಕಡಪುಡ್ಯೆರ್.

ಆನ್-ಆಂಜೊವು ದಾಂತಿ ಕಾಲೊಡು ಗುತ್ತುದ ಘನಸ್ಥಿಗೆನ್ ಸಿರ್ಕಾವರೆ ಬುಡಯೆ ಪಂದ್, ಸಾದಗ ವಿದ್ಯೆ ಕಲ್ದಿನಾರ್ ಬೊಲ್ಲಕ್ಕು ಬೈದ್ಯೆತಿ ಕೈಟ್ಟ್ ದಂಡ್ ದ ಸುರಿಯನ್ ಪತೊಂದು, ಕಾರಿ ಕುದುರೆನೊಂಜೇರೊಂದು, ಬಟಾರ್ಲೆನ್ ಜೋಡಾವೊಂದು ದಂಡ್ ಪತೊಂದು ಕೊಲಲದ ಕಂಡೊಗು ಪಿದಡುವೆರ್.

ಸಾದಿ ಪತೊಂದು, ಬೀದಿಡೆ ನೆರೆಯೊಂದು ಪೋನಗ, ದಂಡೆಕೊಡಿಡ್ ಲೆಕ್ಕೆಸಿರಿನ ನೇಮ ಆದ್ ಅನಿ-ಸಿರಿನ್ ಮರಕ್ಕ್ ಒರಗಾದ್ ದೀತಿನವೆನ್ ತೂದು, ಭೂಮಿ ಬಾರಗೆ ಕನ್ಯಾವು ಲೆಕ್ಕೆಸಿರಿನ್ ಮನಸ್ ಡ್ ಎನ್ನೊಂದು "ಯಾನ್ ಈ ದಂಡ್ ಕಾದ್ ದ್ ಬತ್ತೆಂಡ ಕೌಡೋಡಿ ಗುತ್ತುದ ಚಾವಡಿಡ್ ನಿಕ್ಕ್ ಮಂಚವು ನಾಟಾದ್ ನಂಬುವೆ " ಪಂದ್ ನಿನೆತೊನ್ವೆರ್. ಸುದೆ ಬರಿಟ್ಟ್ ನಂದಾವರದ ದಂಡ್ ದ ಮಾನಿಲೆಗ್, ಬಟಾರ್ಲೆಗ್ ಲೆಕ್ಕೆಸಿರಿ ತನ್ನ ಮಾಯದ ಕಲೆಟ್ಟ್ ಮಾಯಾಕೊದ ನಿದ್ರೆ ಪಾಡುವೆ .ಕೌಡೋಡಿ ಗುತ್ತುದ ದಂಡ್ ಕೊಲಲದ ಕಲ ಮುಟ್ಟುನಗ ಸುದೆ ಬರಿಟ್ಟ್ ಪೊಯ್ಯೇದ ಮಿತ್ತ್ ನಂದಾವರದ ದಂಡ್ ದ ಮಾನಿಲು ಜೆಯ್ದಿನ ತೂದು ಬೊಲ್ಲಕ್ಕುನ ದಂಡ್ ಅಕ್ಲೆನ ತರೆ ಕಡ್ಪುಂಡು, ಬೊಲ್ಲಕ್ಕು ನಂದಾರದ ದಂಡ್ ದ ದಳವಾಯಿನ್ ಕಾದುವಲ್.

ಕೊಲಲ ಕಾದಿನ ಬೊಲ್ಲಕ್ಕುನ ಬಂಟಾದಿಗೆದ ವಿಚಾರ ಇಡಿ ಅಜಿಲ ಸೀಮೆಡ್ ಸುದ್ಧಿ ಆಪುಂಡು.ಬೊಲ್ಲಕ್ಕುನ ಬಂಟಾದಿಗೆನ್ ಮೆಚ್ಚಿನ ಅಜಿಲ ಸೀಮೆದ ಪಟ್ಟಂದ ಕರ್ತುಲು ಕೌಡೋಡಿ ಗುತ್ತುಡ್ ದೋಲು ಬೊಟ್ಟಾವೆರ್, ದೋಲುದ ಶಬ್ಧ ದೂರ ಮುಟ ಕೇನುಂಡ ಆತ್ ಜಾಗನ್ ಕೌಡೋಡಿ ಗುತ್ತುಗ್ ಬುಡ್ ದ್ ಕೊರ್ಪೆರ್. ಕೌಡೋಡಿ ಗುತ್ತುಗ್ ನನಲ ಭೂ-ಸಂಪತ್ತ್ ಪೆರ್ಕುಂಡು. ಪಂಡಿ ಪಾತೆರದಲೆಕ, ಕೌಡೋಡಿ ಗುತ್ತುದ ಚಾವಡಿಡ್ ಪಡ್ಡಾಯಿ ಪದೊಲಿಡ್ ರಾಜ್ಯ-ಕೊಡಮಂದಾಯೆ ಇತ್ತೆಂಡ, ತೆಂಕಾಯಿ ಪದೊಲಿಡ್ ಲೆಕ್ಕೆಸಿರಿನ್ ನಂಬುವೆರ್. ಇನಿಕ್ಲ ಕೌಡೋಡಿ ಗುತ್ತುಡ್ ಬೊಲ್ಲಕುನ ತರೆ ಕುಜಲ್ ದಂಡ್ ದ / ಪಟ್ಟದ ಸುರಿಯನ್ ತೂವೊಲಿ. ಕೌಡೋಡಿ ಗುತ್ತುದ ಬಂಟೆದಿ ಬೊಲ್ಲಕು ಬೈದ್ಯೆತಿ ಪನ್ಪಿ ಪುದರ್ ಡ್ ನಾಲ್ ರಾಜ್ಯ ದಿಕ್ಕ್-ದೇಶಡ್ ಪುಣ್ಯ ಕೀರ್ತಿ ಮೆರೆಪೆರ್.