ಕಾರಂದೂರು ಬರ್ಕೆದ ಬಾರಗೆ ಕಾಂಜ ಬೈದ್ಯೆರೆ ಪರತಿರಿ...

ಕಾಂಜ ಬೈದ್ಯೆರ್, ಎಂಕ್ ಪನವು ಮಲ್ಪೊಡು, ಬೆನ್ನಿ ಆವೊಡು ಪಂದ್ ಮೂಡಾಯಿ ಸೀಮೆದ ಘಟ್ಟಗ್ ಪೋಪೆರ್. ಅವುಲು ಅಕ್ಕಸದ ಬೆನ್ನಿ ಬೆನ್ಪೆರ್, ಕಡ್ಯ-ಕಡ್ಯ ಈಂದ್ ದ ಕಲಿ ಜಪ್ಪಾಯೆರ್. ಪನವು ಮಲ್ತಿನ ಬೈದ್ಯೆರ್, ತುಂಬಲಾತ್ ಬೊಳ್ಳಿದ ಪನವು ಪತೊಂದು ಬೆನ್ನಿ ಮಲ್ಪೆರೆ ಊರುಗು ಬರುವೆರ್, ಊರು ಊರು ತಿರ್ಗುವೆರ್ ಕಾಡ್ ಕಜೆ ತಿರ್ಗುವೆರ್, ಒಂಜಿ ಜಾಗ ತೂದು ಅವುಲು ಕಾಡ್ ಕಡ್ತ್, ಕಂಡ ಮಲ್ತ್, ತೋಡು ಕಡ್ತ್, ಬುಲೆ ಸಲೆ ಮಲ್ಪುವೆರ್. ತನ್ನ ಅದೆಕ್ಕಿಗ್ ಪುದರ್ ದೀಯೋಡು ಪನ್ಪೆರ್. ಕಾರಂದೂರ ಅದೆಕ್ಕಿ ಪನ್ಪೆರ್. ಅದೆಕ್ಕಿಗ್ ದೈವ ಬೋಡು ಪನ್ಪೆರ್ ಕಲ್ಲುರ್ಟಿ ಪಂಜುರ್ಲಿನ್ ಜಾಗದ ದೈವ ಪಂದ್ ನಂಬುವೆರ್.

ಸಂಸಾರ ತೂವೊಂದು ಸುಕೊಟ್ಟು ಕಾರಂದೂರು ಬರ್ಕೆನ್ ಬಾರೊಂದು ಇಪ್ಪುವೆರ್. ನನೊಂಜಿ ಕಾಲೊಗು ಮೂರ್ತೆದ ಕಸುಬು ಮಲ್ಪೊಡು ಎನ್ನಿಬೆರ್ ಬಾರಗೆರ್. ಕುಕ್ಕಿಲದ ಜನನೊಗು ಪೋದು ಅಕ್ಕಸದ ಕಸುಬುಗ್ ಬೂಲ್ಯ ಕೊರ್ಪೆರ್, ಕುಕ್ಕಿಲದ ಭೂಮಿಡ್ ಅಕ್ಕಸದ ಬುಲೆ ದೆಪ್ಪುವೆರ್. ಒಂಜಿ ಕಾಂಡೆ ಮುರ್ತೆಗ್ ಪೋನಗ ನೆರೋಲ್ದದ ಪಲಿಕೆಡ್ ಸ್ವಾಮಿಲು ಒರಿ ಜೆಯ್ದಿನ ತೂಪೆರ್, ನಿದ್ರೆಡ್ ಇತ್ತಿನ ಸ್ವಾಮಿನ್ ತೂಯಿನ ಬೈದ್ಯೆರ್ ಕಾರಂದೂರ ಬರ್ಕೆಗ್ ಬರ್ಪೆರ್, ಮೀದ್ ಶುದ್ಧ ಆದ್ ತುಳಸಿಗ್ ನೀರ್ ಮೈತ್ತೆರ್.

ಉಂಡುದು ತನ್ನ ಬಡಾವು ಕಳೆಯೆರ್. ಸ್ವಾಮಿಲೆನ ಬಡಾವು ತಗ್ಗಿದಿಜಿ ಪಂಡೆರ್. ಗೆಂದಾಳಿ ಬೊಂಡ, ಕಾಯಿ ಪೂಳುನ್ ಕಣತ್ತ್ ಸ್ವಾಮಿನ ಕಾರ ಮುದೆಲ್ ದೀಯೆರ್. ಬೊಂಡ ಪರಿಯೆರ್-ಕಾಯಿ ಪೂಲು ತಿಂದೆರ್ ಸ್ವಾಮೀಲು. ಬಾಳೋಲಿ ಸ್ವಾಮೀಲು ಕಾಂಜ ಬೈದ್ಯೇರ್ನ ಪುರಪ್ಪು ದಾನೆ? ಅದೆಕ್ಕಿ ಓಲು, ಕೇಂದ್ ತೆರಿಯೊಂಡೆರ್. ಅಸರ್ ಪರ್ದ್ ಖುಷಿ ಆಯಿನ ಸ್ವಾಮಿಲು ಬೈದ್ಯೆರೆಗ್ ಅಜೊನಿತ್ತ್ ಬಜೊನಿತ್ತ್ ಆಜಿ ಗುಣಿತ್ತ್ ಮೂಜಿ ಬಜಿತ್ತ್ ಪಂಚೋಳಿ ಬಚ್ಚಿರೆಡ್ ದೈವನೊಂಜಿ ಬರೆದ್ ಕೊರ್ಪೆರ್. ಉಂದೆನ್ ಪತ ಪೋದು ನಿನ್ನ ಇಲ್ಲದ ಪಡ್ಡಾಯಿ ದಿಕ್ಕ್ ದ ಜೋಡು ಕುಕ್ಕುದ ಮುದೆಲ್ ಡ್ ದೈವ ಕರಂದ್ರಾಯೆ ಪಂದ್ ಪುರಪ್ಪು ದೀದ್ ನಂಬುಲ ಪನ್ಪೆರ್. ಸ್ವಾಮಿಲು ಪಂಡಿಲೆಕ ಮಲ್ತೆರ್ ಬೈದ್ಯೆರ್.

ಇಂಚ ಇಪ್ಪುನಗ ಕುಕ್ಕಿಲದ ಜನನೊಡು ಬೈದ್ಯೆರ್ ಪಡೆಯಿ ಸಾಲ ಇತ್ತ್ಂಡಲ ದೈವಗ್ ನೇಮಗ್ ತಯಾರ್ ಮಲ್ದಿನ ಇಚಾರ ಜನನೊದ ಮದಿಮಾರ್ಲೆಗ್ ತೆರಿಯುಂಡು, ಕೋಪೊಡು ಬತ್ತಿನ ಮದಿಮಾಲರ್ಲು ಬರ್ಕೆದ ಬಾಕಿಲ್ಗ್, ಗುವೆಲ್ಗ್, ಕಂಗ್-ತಾರೆಲೆಗ್, ಕುಕ್ಕು ಪಿಲಕ್ಕ್ ಕೊಡಿ ಕಟ್ಟ್ಯೆರ್. ಬೈದ್ಯೆರ್ ಕಟ್ಟಿನೇಮಡ್ ದೈವಡ ಅರಿಕೆ ಮಲ್ತೆರ್. ಪಂಡಿ ಪಾತೆರ ದೊಂಡೆಡ್ ಆವೊಡಾಂಡ ಕುಕ್ಕಿಲದ ಬೂಡುಡ್ ಮದಿಮಾಲರ್ಲು ಕರಿಯ ನುರೆ ಬೊಳಿಯ ನುರೆ ಕಾರ್ದ್ ಬೂರ್ವೆರ್. ಬೈದ್ಯೆರ್ ಕುಕ್ಕಿಲದ ಜನನಗ್ ಬರೊಡು ಪನ್ಪೆರ್.ನೇಮ ಪಿರೀದ್ ಬೈದ್ಯೆರ್ ಜನನೊಗು ಪೋಪೆರ್, ಅವುಲು ತನ್ನ ಸೊಂಟದ ನೆವಲ ದೆತ್ತ್ ಈಡ್ ಕಟ್ಟ್ ದ್ ದೈವಡ ತಪ್ಪು ನಟ್ಟುವೆರ್. ಮದಿಮಾಲಾರ್ಲು ಲಕ್ಕ್ ದ್ ಕುಲ್ಲ್ಯೆರ್. ದೈವ ಕರಂದ್ರಾಯನ್ ಜನನಡ್ ನಂಬಿಯೆರ್. ಕಾಂಜ ಬೈದ್ಯೇರ್ನ ಕಾಲ ಕರೀದ್ ಪೋನಗ ಅರೆನ್ ದೈವ ಕರಂದ್ರಾಯನ ಬಲತ್ತ್ ಡ್ ನಂಬುದು, ಹಿರಿಯಾರ್ ಪಂದ್ ನೇಮ ನೆರಿತ್ತ ಕಟ್ಲೆ ಮಲ್ಪುವೆರ್.