ತುಳುನಾಡ ಬಲೀಂದ್ರನ ಕಥೆ : ನೂತೊಂಜಿ ಆಯಾಮೊಲು

ಬಲೀಂದ್ರನ ಕಥೆ ಜಾನಪದೀಯವಾದ್ ಜನಮಾಸಗ್ ಸೇರ್ದ್ ತುಳುನಾಡೋರ್ಮೆ ಬಲೀಂದ್ರ ಪೂಜೆ , ದೀಪೋಲಿ ಪೂಜೆ, ಭೂಮಿ ಪೂಜೆ, ಬೊಲ್ಪುದ ಪೂಜೆ, ಗೋಪೂಜೆ , ದೈವಾರಾಧನೆ ಬೊಕ್ಕ ಹಿರಿಯೆರೆ ಆರಾಧನೆ ಪನ್ಪಿನ ಬೇತೆ ಬೇತೆ ಪರಿಕಲ್ಪನೆಡ್ ನಡತೋಂದು ಬರೋಂದುಂಡು.

ಬಲೀಂದ್ರನ ಕತೆಕ್ ಸುಮಾರ್ ಆಯಾಮಲುಲ್ಲ. ದಕ್ಷಿಣ ಭಾರತಡ್ ಬಲಿ ಪೌರಾಣಿಕ, ಐತಿಹಾಸಿಕ, ಸಾಂಸ್ಕೃತಿಕ, ಜಾನಪದೀಯ ನಾಯಕೆಯಾದುಲ್ಲೆ. ಬಲಿ ಪನ್ಪುನೈತ ಶಬ್ದಾರ್ಥ ಯಜ್ಞ, ದಾನ, ಸಮರ್ಪಣೆ ಬೊಕ್ಕ ಆಕರ್ಷಣೆ ಆದುಂಡು. ಬಲಿ ( ಮಲಯಾಳಡ್ ಬೆಲಿ) ಸಮೃದ್ಧಿ ಬೊಕ್ಕ ಉತ್ಕರ್ಷದ ಸಂಕೇತ.

ಪೌರಾಣಿಕವಾದ್ ಬಲಿನ ಕಥೆ ಭಾಗವತ ಬೊಕ್ಕ ವಿಷ್ಣು ಪುರಾಣಡ್ ತಿಕ್ಕುಂಡು. ಬಲಿ ಮಹಾ ವಿಷ್ಣು ಭಕ್ತೆ ಪ್ರಹ್ಲಾದನ ಪುಲ್ಲಿ. ಬಲಿನ ಬುಡೆದಿ ವಿಂದ್ಯಾವಳಿ ಬಲಿಗ್ ದಾನ ಧರ್ಮಗ್ ಬಲದ ಕೈ ಆದಿತ್ತಿನಾಲ್. ಬಲಿ ಭೃಗುಕಚ್ಛಾ ( ಇತ್ತೆದ ಗುಜರಾತ್ ದ ಭರೂಚ) ಪನ್ಪಿನಲ್ಪ ನೂದನೆ ಅಶ್ವಮೇಧ ಮಲ್ಪುನ ಸಂಧರ್ಭ ವಿಂಧ್ಯಾವಲಿ ಅಲ್ಪನೆ ಇತ್ತಲ್. ಅಲೆನ್ ಎದುರುಡೇ ಯಾಗ ಶಾಲೆಗ್ ವಿಷ್ಣು ದೇವೆರ್ ವಾಮನ ರೂಪಡ್ದ್ ಬತ್ದ್ ದಾನ ಕೇಂಡ್ನಿ. ಬಲಿನ ಮಗಲ್ ರತ್ನ ಮಾಲಗ್ ವಾಮನ ವಟುನು ತೂದು ಮಾತ್ರ್ ವಾತ್ಸಲ್ಯಡ್ ಮಿರೆ ಪೇರ್ ಕೊರ್ಪಿನ ಆಸೆ ಆಂಡ್ಗೆ. ಆಂಡ ವಾಮನ ವಟು ತನ್ನ ಅಮ್ಮೆ ಬಲಿ ಕ್ ದಾನ ಕೇಂದ್ಡ್ ಮೋಸ ಮಲ್ತಿನಾವರ ವಿಷತ ಪೇರ್ ಕೊರೋಡು ಪನ್ಪುನ ಕ್ರೋಧ ಬತ್ತಂಡ್ಗೆ. ಆ ಕಾರಣಡ್ ವಿಷ್ಣು ದೇವೆರ್ ಸಂಕಲ್ಪ ಲೆಕ್ಕ ರತ್ನಮಾಲಾ ದ್ವಾಪರ ಯುಗಟ್ ಪೂತನಿಯಾದ್ ಮಾತ್ರ್ ವಾತ್ಸಲ್ಯಡ್ ಕೃಷ್ಣ ದೇವೆರೆಗ್ ಮಿರೆ ಕೊರ್ದು, ಅವು ವಿಷತ ಮಿರೆ ಕೊರ್ದು, ಅಪ್ಪೆ ಸ್ಥಾನಗ್ ಏರ್ದ್ ಮೋಕ್ಷಗ್ ಸಂದಿಯೋಲುಗೆ.

ಬಲಿಗ್ ನೂದು ಜೋಕುಲು. ಮಲ್ಲ ಮಗೆ ಬಾಣಾಸುರೆ. ಅಯನ್ ಕೃಷ್ಣ ದೇವೆರ್ ಕೆರ್ಪೆರ್. ಬಾಣಾಸುರನ ಮಗ ಲ್ ಉಷನ್ ಕೃಷ್ಣ ದೇವೆರ್ ಪುಳ್ಳಿ ಅನಿರುದ್ಧ ಮದಿಮೆ ಯಾಪೆ.

ಬಲಿ ದೇವಲೋಕ ಗೆಂದಿನಾವರ ಬಲೀಂದ್ರ ಆಯೆ. ವಿಷ್ಣು ದೇವೆರ್ ಬಲಿಕ್ ದುಂಬಗ್ ಎಣ್ಮನೆ ಮನ್ವಂತರ ಸಾವರ್ಣಿಡ್ ಇಂದ್ರ ಆಲಾ ಪಂಡ್ದ್ ವರ ಕೊರ್ಪೆರ್.

ಉಂದು ಪೌರಾಣಿಕ ಹಿನ್ನಲೆ ಯಾಂಡ, ಬಲಿ ತುಳುನಾಡ ರಾಜೆ ಎಂಚ ಆಯೆ ಪನ್ಪುನವು ನನೊಂಜಿ ಪ್ರಶ್ನೆ. ಉತ್ತರ ಭಾರತದ ಪೌರಾಣಿಕ ಕಥೆದ ಬಲಿ ದಕ್ಷಿಣ ಭಾರತಗ್ ಬತ್ತಿನ ಒವ್ವೇ ಸಾಕ್ಷಿ ಇಜ್ಜಿ. ಪುರಾಣ ಕಥೆನ್ ಜಾನಪದ ನಿಲೆಟ್ ಜನಕುಲು ಸ್ಥಳೀಯ ರಾಜೆ ಪಂಡ್ದ್ ಪರಿವರ್ತನೆ ಮಲ್ತಿಪ್ಪುವೇರ್. ಇಂಚಿನ ಕಥೆಕುಲೆನ್ ನಮ ಮೌಖಿಕ ಸಾಹಿತ್ಯಲೆಡ್ ತೂಪ. ಕೇರಳಡ್ ಬಲಿನ್ ಸ್ವಾಗತ ಮಲ್ಪುನ ನಾಡ ಪರ್ಬ ಓಣಂ. ಬಲಿನ್ ಕೇರಳಡ್ ಮಾವೆಲಿ ಪಂಡ್ಡ್ ಲೆಪ್ಪುವೆರ್. ಬಲಿನ ಊರು ಎಂಚ ಇತ್ತಂಡ್ ಪನ್ಪಿನ ಉಲ್ಲೇಖ ಓಣಂ ಪಾಟ್ ಡ್ ಬರ್ಪುಂಡು. " ಮಾವೇಲಿ ನಾಡ್ ವಾಣಿಡುಂ ಕಾಲಂ, ಮನುಷ್ಯರೆಲ್ಲರುಂ ಒನ್ನು ಪೋಲೆ " ಪನ್ಪಿನ ಪಾಟ್ ಡ್ ಪೂರಾ ಜನಸಮುದಾಯ ಸೌಹಾರ್ದತೆಡ್, ಸಮೃದ್ಧಿಡ್ ಬೊಕ್ಕ ಸಂತೃಪ್ತಿಡ್ ಬಲಿನ ರಾಜ್ಯ ಡ್ ಬದ್ಕೋಂದಿತ್ತೆರ್ ಅರ್ಥದ ನುಡಿ ಕೊರ್ಪುಂಡು.

ಓಣಂ ನಿಜವಾದ್ ಸುರು ಆತಿನಿ ತಮಿಳ್ ನಾಡ್ಡ್. ಪಿರಾಕ್ದ ಕಾಲಘಟ್ಟಡ್ ಚೋಳ, ಚೇರ, ಪಾಂಡ್ಯ ( ಈ ಪ್ರದೇಶನ್ ಪ್ರಾಚೀನವಾದ್ ತಮಿಳಗ ಪನ್ಪೇರ್) ಬೊಕ್ಕ ಸತಿಯ ಪನ್ಪಿನ ದಕ್ಷಿಣ ಭಾರತದ ಭೂಪ್ರದೇಶಡ್, ತಮಿಳ್ ನಾಡ್ ಡ್ ಪ್ರಾಚೀನವಾದ್ ಬಲಿನ ಆರಾಧನೆ ಇತ್ತಿನೈಕ್ ಸಾವಿರ ವರ್ಷ ಪಿರವುದ ಸಂಗಂ ಸಾಹಿತ್ಯ ಆಧಾರ ಕೊರ್ಪುಂಡು. ಕ್ರಮೇಣ ರಾಜಕೀಯ ಬೊಕ್ಕ ಬೇತೆ ಕಾರಣಡ್ ಅಲ್ಪ ಅವು ಉಂತುದು, ತಮಿಳಗದ ಭಾಗ ವಾದಿತ್ತಿನ ಚೇರ ( ಕೇರಳ) ಭಾಗಡ್, ಓಣಂ ಸುರುವಾಂಡ್.

ತಮಿಳ್ ನಾಡ್ ದ ಮಹಾಬಲಿ ಪುರಂ ಬಲಿನ ಅಸ್ತಿತ್ವ ಬೊಕ್ಕ ಪುರಾತನ ಆರಾಧನೆಗ್ ಸಾಕ್ಷಿಯಾದುಂಡು. ಮಹಾಬಲಿ ಪುರಂ ಕಟ್ಟ್ ದಿನಿ ೭ ನೆಯ ಶತಮಾನದ ಪಲ್ಲವ ರಾಜೆ ಒಂಜನೆ ನರಸಿಂಹ ವರ್ಮೆ. ಆಯೆ ಮಹಾಮಲ್ಲ ಆಯಿನವರ ಅವು ಮಾಮಲ್ಲಪುರಂ ಆದ್ ಮಹಾಬಲಿಪುರ ಆಂಡ್.

ಸರ್ವದಾನ ಕೊರ್ಪಿನ ಬಲಿಂದ್ರ ನ ಕಥೆ ತುಳುನಾಡ ಪಾಡ್ದನದ ಬೇತೆ ಬೇತೆ ಆವೃತ್ತಿಲೆಡ್ ನಮಕ್ ತಿಕ್ಕುಂಡು. ಪೊಳಲಿ ಶೀನಪ್ಪ ಹೆಗ್ಗಡೆರ್ ಬರೆತಿನ ತುಳುವಾಲ ಬಲೀಂದ್ರ ಪುಸ್ತಕ ಬೊಕ್ಕ ಡಾ. ಕನರಾಡಿ ವಾದಿರಾಜ ಭಟ್ಟ್ ಮೇರೆನ ಸಂಗ್ರಹದ ಪಾಡ್ದನಲು ತುಳುನಾಡ ಬಲೀಂದ್ರನ ಜಾನಪದ ನಿಲೆತ ಐಹಿತ್ಯ ಬೊಕ್ಕ ಮೌಖಿಕ ಸಾಹಿತ್ಯದ ವಿಶೇಷತೆನ್ ತೋಜಾವುಂಡು . ಬಲೀಂದ್ರೆ ಬಡಕಾಯಿ ಘಟ್ಟಡ್ಡ್ ತೆನ್ಕಾಯಿ ಕಡಲ್ ಮುಟ್ಟದ ಪ್ರದೇಶ ಆಲೋಂದಿತ್ತೇ. ಮಹಾ ಪರಾಕ್ರಮಿ ಬಲಿನ ವೈಭವ ತೂದು ದೇವತೆಲು ಮಚ್ಚರಡ್ ತೇತ್ರಾಯುಗಟೇ ಕಲಿ ಪುರುಷನ್ ಬಲಿನ ಊರುಗು ಕಡ್ಪುಡ್ವೆರ್.

ವಾಮನೆ ಪುಟ್ಟುದಿನ ವಿವರಣೆ ಪಾಡ್ದನಡ್ ಭಾರಿ ವಿಶೇಷವಾದ್ ಬಯಿದಂಡ್." ಕರಿ ಮಿನಾ ಸಾಲೆಡ್, ಪೂತ ಬಿತ್ತಿಲ್ಡ್, ಮುತ್ತು ತಾವರೆದ ಕಿರೆಟ್, ಪಾಲಿ ಕುಲಟು, ಬೊಳಿಯ ತಾಮರೆ ಪೂಟು, ಆಜಿ ಎಸಲ್ಡ್ ಮೂಜಿ ಕುಸುಮಡ್ ಉದಿಯ ಬೆಂದೆರ್ಗೆ". ಇಂಚ ಪುಟ್ಟಿಯೆರ್ಗೆ. ಕರ್ ಮಿನಾ ಸಾಲೆ ಪನ್ಪಿನವು ಕೋಟಿ ಚೆನ್ನಯ ಬೊಕ್ಕ ಒಡ್ತೆ ಪಂಜುರ್ಲಿ ಪಾಡ್ದನದ ಬಯಿದಂಡ್. ಅವು ಕಮಲ ಶಿಲೆ ಆದಿಪ್ಪು.

ದಾನ ಕೊರಿ ಬೊಕ್ಕ ಮೂಜಚ್ಚರದ ಮಾಣಿ ( ವಾ ಮ ನ) ಆಜಚ್ಚರದ ಮಾಣಿಯಾದ್ ಮೂಜಿ ಲೋಕನ್ ಲಪ್ಪುನ ಭವ್ಯ ಚಿತ್ರಣ ಪಾಡ್ದನದುಂಡು.

" ಮೂಜಿ ಎಚ್ಚರದ ಮಾಣಿ ಮಾಯ ಆದ್ ಆಜಿ ಆಚ್ಚರದ ಮಾಣಿ ಆಯೇರ್, ಮಾಣಿಗುಲೆ ತರೆ ಮೇಲ್ ಲೋಕ ಕಡತಂಡ್, ಬಲತ ಕೈ ಮೂಡಯಿ ಕಡಲ್, ಎಡತ ಕೈ ಪಡ್ಡಾಯಿ ಕಡಲ್ ಕಡ ತಂಡ್... ಮಾಣಿಗುಲೆ ತರೆಡ್ಡ್ ಕಾರ್ ಮುಟ್ಟ ತೂನಗ ಭೂಮಿ ಪಾತಾಳ ಆದಿ, ಅಕ್ಕಸ ಮೇಲ್ ಲೋಕೋಡು ಇಪ್ಪುಂಚಿ ದೈಯ್ಯ ದೇವೆರ್, ರಾವು ರಕ್ಕಸ, ಭೂತ ಪಿಶಾಚಿ, ಪಕ್ಕಿ ಪರಣೆ, ಪಿಲಿ ಬಲಿಪೆ, ಕೈಕಂಜಿ, ಆನೆ, ಕುದುರೆ, ಮರಿ ಕಂದಡಿ, ಎಲಿ ಪೆರ್ಗುಡೆ, ನೆಗರ್ ಮುದಲೆ, ಉರೆ ಕಡಮೆ, ಮಂಗೆ ಸಿಂಗೆ ಮಾತ ತೋಜಿದ್ ಬತ್ತಂಡ್ಗೆ . ತೂಪಿಂಚಿ ನರ ಮಾನ್ಯಗ್ ತೂವರೆ ಕಣ್ಣ್ ತೋಜುಜಿಗೆ, ಜನಮಾನಿ ತರೆಗಿರಿದ್ ಮತಿಗೆಟ್ಟ್ ದ್ ಮಗ್ರಿಯೆರ್ ಗೆ.." ಇಂಚ ಪಾಡ್ದನಡ್ ಕಾವ್ಯದ ವಸ್ತು ನಿರೂಪಣೆಡ್ ವಿಶ್ವರೂಪ ದರ್ಶನದ ಚಿತ್ರಣ ಅಪ್ಯಾಯಮಾನವಾದುಂಡು.

ಮೂವೆರ್ ಮಾನಿಲು( ಮೂವೆರ್ ಏರ್?) ಸರ್ವದಾನ ಕೊರ್ಪುನ ಬಲಿನ ಆಸ್ಥಾನಗ್ ಬತ್ತಿನ ಸಂದರ್ಭದ ಚಿತ್ರಣ ಇಂಚ ಉಂಡು: " ಬೋಲ್ಮೋಡು ಬೊಲ್ಪುಗು, ಕೋರಿದ ಕಿಲೆಪುಗು, ಬೊಳ್ಳಿ ಎರ್ಮೆ ಸ್ವರ ಕೊರ್ನಗ ಬತ್ತ್ ಉಂತುವೆರ್ ಮೂವೆರ್ ಮಾಣಿಲು..".

ವಾಮನ ದೇವೆರ್ ಮೂಜಿ ಪಜ್ಜೆ ಜಾಗ್ ಕೇಂದ್ಡ್ , ರಡ್ಡ್ ಪಾದ ಲತ್ತಿ ಬೊಕ್ಕ, ನನಂಜಿ ಪಾದ ಓಲು ಊರೊಡು ಪಂಡ್ಡ್ ಬಲಿಟ ಕೇನ್ನಗ, ಎನ್ನ ತಿಗಲೆಗ್ ಪಾದ ಊರುಲೇ ಪಂಡ್ಡ್ ಪನ್ಪೆ. ಅಪಗ ಮಾಣಿಲು " ಸರ್ವದಾನ ಮಲ್ಪುನ ಪುಣ್ಯ ಪುರುಷನ ತಿಗಲೆಗ್ ಪಾದ ಊರಾಯ, ಪಾಪ ತುಂಬಾಯ " ಪಂಡ್ಡ್ ಬಲಿನ್ ಪಾತಾಳಗ್ ಕಡ್ಪುಡ್ದ್ ಕೊರ್ಪೆರ್. ಬಲಿನ ತರೆಕ್ ಪಾದ ಊರುದಿನ ಕಥೆ ತುಳು ಪಾಡ್ದನಡಿಜ್ಜಿ. ಸರ್ವದಾನಿ ಬಲಿ ಪನ್ಪಿನ ಪುಣ್ಯ ಪುರುಷನ್ ಪಾತಾಳಗ್ ಕಡ್ಪುಡ್ವೆರ್ ಪನ್ಪಿನ ಉಲ್ಲೇಖ ಮಾತ್ರ ಪಾಡ್ದನದುಂಡು.

ಬಲೀಂದ್ರನ್ ತುಳುನಾಡ ಜನಕುಲು ತನ್ಕುಲೆನ ಅರ್ತಿ ಪಿರ್ತಿದ ಒರಿ ರಾಜೆ ಪನ್ಪಿನ ನಿಲೆಟ್, ಇಲ್ಲ ಸುತ್ತ, ಕಂಡ ಪುಣಿ ಕೋಡಿ ಮೂಲೆ, ಬಾಕಿಮಾರ್ಗ್ ಬೊಲ್ಪು ದೀದ್ ಕೂ ಲೆತ್ಡ್, ಉರ್ದುದ ದೋಸೆ, ಬೆಲ್ಲ ತಾರಾಯಿದ ಮಂಜಲ್ ಇರೆತ ಗಟ್ಟಿ, ಬಜಿಲ್ ಮುರೆತ್ ಪನಿಯಾರ ಮಲ್ತ್ದ್ ಸಂಭ್ರಮ ಆಚರಣೆ ಮಲ್ಪುವೆರ್. ಪರ್ಬಗ್ ಸೈತಿನಕ್ಲೆಗ್ ಬಳಸುನ ಕ್ರಮ ಉಂಡು. ಪಾಲೆ ಮರತ ( ಬಲೆಕಿ ಮರ) ಕೋಲು ಕಣತ್ ದ್, ಅಯಿನ್ ಸಿಂಗಾರ ಮಲ್ ತ್ದ್, ಬೊಲ್ಪು ದೀದ್ ಬಲಿಂದ್ರೆ ಲೆಪ್ಪುವೆರ್. ಗೊಂಡೆ ಪೂ ಬೊಕ್ಕ ಪಾದೆ ಪೂಟು ಅಲಂಕಾರ ಮಲ್ಪುವೆರ್. ಪಾಲೆದ ಗೆಲ್ಲ್ ಡ್ ದೀಪ ದೀದ್ ನಡಪುನ ಭೂಮಿ ಪೂಜೆ ನಿಜವಾದ್ ಬೆರ್ಮೆರೆಗ್ ಸಂದುನ ಪೂಜೆ. ಗೋಪೂಜೆ ದೋಟ್ಟುಗು ನುಗ ನಾಯೆರ್ , ಕಲಸೆ, ಸೇರ್, ಪಾವು, ತಡ್ಪೆ, ಸೇರ್ದ್ ಪೂರಾ ಕೃಷಿ ಮೂಲದ ವಸ್ತುಲೆಗ್ ಪೂಜೆ ನಡಪುಂಡು.

ಪಾಲೆ ಮರ ಬೆರ್ಮೆರ್( ನಾಗ ಬೆರ್ಮೆರ್) ಸಾನಿಧ್ಯಯಿಪ್ಪುನ ಮರ. ಪಿರಾಕ್ಡ್ ಪ್ರತೀ ಗರಡಿಡ್ ಪಾಲೆ ಮರ ಕಡ್ಡಾಯವಾದಿತ್ತಂಡ್. ಪಾಲೆ ಮರತ ಇರೆತ ಗೆಲ್ಲ್ ಐನ್ ಕವರ್ದ ತಿಕ್ಕುಂಡು. ಬಲಿ ಚಕ್ರವರ್ತಿ ಪನೆ ಓಲೆದ ತತ್ರ ಪಸೋಂದು ಬರ್ಪಿನ ಕಲ್ಪನೆಟ್, ಪಾಲೆದ ಮರತ ಇರೆತ ಅಂತಸ್ತ್ ದ ಗೆಲ್ಲ್ ಆಯಗ್ ತತ್ರ ಆದ್ , ಅಯಿತ ಮಿತ್ತ್ ದ ದೀಪ ಬಲಿ ಕ್ ಸಾದಿ ತೋಜಾವುಂಡು ಪನ್ಪಿನ ಪರಿಕಲ್ಪನೆ ಉಂಡು. ಕೇರಳ ಬೊಕ್ಕ ತಮಿಳ್ ನಾಡ್ ಡ್ ಪಾಲೆ ಮರತ ಕೋಲುನು ಬಳಕೆ ಮಲ್ಪುನ ಕ್ರಮ ಇಜ್ಜಿ. ಅವು ತುಳುನಾಡ್ಡ್ ವಿಶೇಷವಾದಿಪ್ಪುನ ಆಚರಣೆ. ಪಾತಾಳಗ್ ಪೋಯಿ ಬಲೀಂದ್ರ ವರ್ಷಗೊರ ತುಳುನಾಡ್ ಗ್ ಬನ್ನಗ ಸಾದಿ ತೋಜಾವುನ ಬೊಲ್ಪು ಬೆರ್ಮೆರ್ ಸಾನಿಧ್ಯದ ಪನ್ಪಿನವು ಆತೇ ವಿಶೇಷವಾಯಿನವು. ಪೇರ್ ಬರ್ಪಿನ ಮರತಡಿಟ್ ಕೆಲವು ದೈವಲು ಮಾಯವಾಯಿನ ನಿದರ್ಶನಲು ಉಂಡು. ಪಾತಾಳಗ್ ( ನಾಗಲೋಕ ಪನ್ಪಿನ ತುಳು ನಾಡ್)ಪೋಯಿ ಬಲಿ ಮುಲ್ಪನೆ ಬೆರ್ಮೆರ್ ಸಾನಿಧ್ಯಗ್ ಸೇರಿಗೆ ಆದಿಪ್ಪುನ ಸಾಧ್ಯತೆ ಉಂಡು. ಏಲ್ ನಿಲೆತ ದೀಪ, ಆಜಿ ದಿನತ ಬಲಿ ಬೊಕ್ಕ ಮೂಜಿ ದಿನತ ಪೊಲಿ ಉಂಡು ಪಂಡ್ಡ್ ತುಳುನಾಡ ತುಡರ್ ಪರ್ಬದ ನಿಯಮ ಪನ್ಪಿನವು ಕ್ರಮ.